Артём Здунов: «Чадыведесь ды кирвазематне ушодовить куш зярдо, миненек эряви улемс анококс тенень»

Артём Здунов: «Чадыведесь ды кирвазематне ушодовить куш зярдо, миненек эряви улемс анококс тенень»

Мордовия Республикань Прявтонь тевтнень топавтыцясь Артём Здунов эйзюрковонь 3-це чистэ Экологиянь, технологической ды атомной надзоронь коряс Федеральной службань Волжско-Окской управлениянь руководителенть Игорь Кокунов марто ваннызе Мордовиянь МЧС-нь аварийной ды толонь мадстемань-идемань техникань анокчинть.

Чадыведентень анокстамонть Мордовиянь идицятне ушодыть ве шкасто кирвазематнень а нолдамонь коряс важодематнень марто. Мордовиява Россиянь МЧС-нь главной управлениянь прявтось Андрей Наумов тешкстызе, неть зыянтнэнь ютксо шкась аволь ламо. Секскак Артём Здунов кармавтсь улемс покш анокчинь режимсэнть. «Минь пштистэ весементь вансынек, эдь весе те лиси куш зярдо ды пек куроксто. Миненек эряви улемс анококс куш кодат тевтненень», - тешкстызе Мордовия Республикань Прявтонь тевтнень топавтыцясь.

Прявт техникатнестэ вейкесь – таркасто таркас шаштневиця управлениянь республикань пунктось. Тов совить кавто автомобильть, вейкесь эйстэст – республикань Прявтонть ды ЧС-нть коряс комиссиянь важодемань таркатне. Омбоце автомобилесь – связень мобильной сюлмось, тесэ ули коротковолновой, ультракоротковолновой ды натой спутниковой связь.

Эштё вейке прявт автомобилесь – арсезь-анокстазь республикасонть. Сонзэ нолдызе Рузаевкасо «Нефтегазмаш» компаниясь. Лиякс кортазь, те мобильной эрьке, конась пек эрявикс сеть эрямонь пунктнэнь туртов, косо улить стакачить ведень саеманть марто. Республикасонть кавто истят толонь мадстемань машинат: Атюрьевасо ды Ельниксэ. Сынь теезь ды рамазь 2011 иестэнть. Неть автомобильтнень прявт тевест – аволь мадстемс, а максомс ведь операциянь лия участнкитненень.

2014 иестэнть республикань толонь мадстемань техникань паркось одкстомтовсь 70%. Саранскойсэ ды Рузаевкасо сонзэ полавтызь целанек. Региононь толонь мадстемань эрьва частентень явозь сехте аламо вейке-вейке автомобиль, те истя жо теезель 2018 иень футболонь коряс масторлангонь чемпионатонтень анокстамонть лувсо. Андрей Наумовонь валонзо коряс, технической оснащенностенть ды техникань анокчинь процентэнть коряс Мордовиясь васенцетнень ютксо Россиянь Федерациясо.

Ваннызь укшномань средстватненень, сынь улест анокт чить ды веть. Те пувазь, каркасонь, милёнь, моторонь венчт ды катерт. Сынь улить зярыя подразделениятнесэ: региононь толонь мадстемань-идемань отрядсонть Саранскоень отрдясонть, Саранскоень толонь мадстемань специализированной частесэнть ды маломерной судатнень коряс государственной инспекциясонть.

Игорь Кокунов яволявтсь: «Идициятне анокстыть куш кодат тевтненень. Чадыведесь карми, ды ули покш мель арсемс, специализированной те техникась нолдавозо тевс ансяк тонавтоматнень лувсо».

Андрей Наумов мерсь, бути венчтне ды катертнэ а кармить сатомо, ветязь кортамот муниципалитетнэнь, ГИМС-нь аволь штатной инспектортнэнь ды укшномань средстватнень азортнэнь марто. Сынь анокт явомс лезкс региононь идициятненень.

Мордовия Республикань Прявтонть пресс-службась