Артём Здунов – коронавирусонь инфекциядонть: «Эпидемиянь а нолдамонь тевтне ванстыть эрявиксчист»

Артём Здунов – коронавирусонь инфекциядонть: «Эпидемиянь а нолдамонь тевтне ванстыть эрявиксчист»

Мордовиянь Прявтонь тевтнень топавтыцясь Артём Здунов эйзюрковонь 4-це чистэ ютавтсь республикасонть коронавирусонь инфекциянть профилактикань ды седе тов а нолдамонь коряс оперативной штабонь промкс. Кортамось мольсь эпидемиологиянь неень шкань тевтнеде, региононь шумбрачинь ванстомань системанть важодемадонзо, COVID-19 каршо ливксэнь путомадонть, санитарно-эпидемиологиянь вешематнень топавтомадост.

Мордовиянь Прявтонь тевтнень топавтыцясь тешкстызе, коронавирусонь инфекциянть коряс тевтне аштить свалшкань лувсо. Те недлястонть весе сэредицятнень ютксто 44 проценттнэ 60 иеде седе сыре ломанть. Ковидэнь лувсо важодить шумбрачинь ванстомань 8 учрежденият – те 935 таркат, чавот 29%. Эштё кавто больництяне велявтозь важодемань свалшкань лувонтень.

«Апак вано сень лангс, эрьва чистэ редявить 50 седе аламо сэредицят, амбулаторной пациенттнэ киртявсть, госпитальтнес сэредицятнень каямось поладови – ней тосо малав 700 ломанть, - мерсь Артём Алексеевич. – Башка муниципалитеттнэсэ ванстови орманть касомась».

Ледстясынек, даволковонь 26-це чинь оперативной штабонь промкссонть тешкстазель орманть касомась Орданьбуень ёнкссо. Кода пачтясь МР-ва санитарной прявт врачось Татьяна Харитонова, республикань руководителенть кармавтоманзо коряс те недлястонть тосо важодсь специальной комиссия.

«Комиссиясь якась COVID-19 орманть коряс эпидемиологиянь тевтнень ванномо ды покштнень ды эйкакштнень ютксо орманть куватьс регистрациянь тувталтнэнь муеме. Минь неинек, меельце колмо недлятнень перть ламо сэредицят тонавтнемань учреждениятнесэ. Лангс ливтезель, эйдень кужотнестэ шкастост изоляцияс апак пачтя эйкакштне ды тонавтыцятне. Истя жо эйдень кужотнесэ а сатыть рециркуляторт – эли вейке зярыя группас эли вейке весе эйдень кужонь келес», - тешкстызе Татьяна Харитонова.

Тень кувалма республикань руководителесь кармавтсь весе районтнэнень ютавтомс тонавтнень учреждениятнесэ рециркулятортнэнь инвентаризациянть. «Эряви лездамс неть организациятненень, косо истят прибортнэ а сатыть. Те карми видекс!» - мерсь Артём Алексеевич.

Оперштабсонть тешкстазель, тундонть самось – школасо тонавтницятнень ютксо ОРВИ-сэ сэредемань касомась. Республиканть келес недлянь перть касомась кармась 7%, Саранскойсэ – 12%.

Поладови конронавирусонь каршо ливксэнь путомась. Течи республикав пачтязь 40837 дозат. Эйзюрковонь 9-це чинтень регионтень пачтявить эштё 7300. Ламо сэредицят сыре ломантнень ютксо. Секскак сыненст васенцекс эряви путомс ливкст.

«Талновты минек маласо аштиця РФ-нь субъекттнэсэ сэредицятнень ламолгадомась, - тешкстызе Мордовиянь Прявтонь тевтнень топавтыцясь. – Секскак ормань педямонь рисктне ванстовить. Россиянь Роспотребнадзоронь ды Минздравонь рекомендациятнень коряс эпидемиянь а нолдамонь весе тевтне ванстыть эрявиксчист. Минь мезеяк эзинек полавто, ансяк ютавтовсть спортонь прявт мероприятият, ушосо мероприятият, а стувтанок маскатнень кандтнемадост. Улить Роспотребнадзоронь вешемат, секе тев ютавтовить ванномат, ансяк коламотне редявить. Башка организациятне а топавтыть сэтьмечинь вешематнень – истят тевть, ризксэс, улить. Нейгак редявить тевть, зярдо услугатне явовить ломантнень, конат маскавтомот, а ютавтови дезинфекция, а ветяви ваннома важодицятнень ёжост мельга. Секскак властень органтнэнь ды муниципальной образованиятнень прявттнэнень эряви кирдемс тевтнень пшти ванновт ало. Тень пингстэ покш мель явомс ламо ломанень пурнавома таркатненень».

Мордовия Республикань Прявтонть пресс-службась