Артём Здунов – Краснослободской ёнксонь прявтонтень: «Важодезэ модань эрьва пелькскесь!»

Артём Здунов – Краснослободской ёнксонь прявтонтень: «Важодезэ модань эрьва пелькскесь!»

Мордовиянь Прявтонь тевтнень топавтыцясь Артём Здунов эйзюрковонь 4-це чистэ важодемань содавтома марто якась Краснослободской ёнксов. Региононь руководителесь теевсь содавиксэкс промышленной ды велень хозяйствань предприятиятнень марто, ваннызе строявиця спортонь комплексэнть. Меельцекс макссь зярыя кармавтомат муниципалитетэнь прявтонтень.

Артём Алексеевич яволявтсь: васняяк эряви кастомс муниципалитетэнь доходтнэнь. Маласо шкастонть райононь властненень эряви ютавтомс райононь инвентаризациянть: муемс чавосто аштиця модатнень ды кадозь зданиятнень азортнэнь, тешкстамс бюджетэнь доходонь прявт статьятнень.

«Тесэ улить мельстуиця таркат, теке жо Сивинесь. Тесэ икеле ульнесть эйкакшонь лагерьть ды санаторият. Эряви тешкстамс, мезе карматанок тееме седе тов: поладомо те ёнксонть эли вешнеме мезе-бути од. Важодезэ модань эрьва пелькскесь!» - тешкстызе Мордовиянь Прявтонь тевтнень топавтыцясь.

Краснослободской ёнксонь прявтось Алексей Буйнов мерсь, тевтне сонензэ чарькодевикст ды сон шкань апак ёмавтне кунды сынст топавтомо. Истя жо сон ёвтнесь сыця чадыведентень райононть анокстамодонзо.

Мордовия Республикань Прявтонть пресс-службась