Артём Здунов: «Сыця лембетнестэ эряви парсте анокстамс сёксень-телень шкантень»

Артём Здунов: «Сыця лембетнестэ эряви парсте анокстамс сёксень-телень шкантень»

Эйзюрковонь 3-це чистэ МР-нь Прявтонь тевтнень топавтыцясь Артём Здунов ютавтсь важодемань вастовома Экологиянь, технологической ды атомной надзоронь коряс Федеральной службань Волжско-Окской управлениянь руководителенть Игорь Кокунов марто. Кортамось мольсь коммунальной кевкстематнеде: уштомань шканть ютамодонзо ды сыця чадыведентень анокстамодонть.

Артём Здунов тешкстызе, сыця уштомань шкантень анокстамонть эряви саемс башка ванновт алов. 2020-2021 иетнень телесь невтизе, республикань эрямонь зярыя пунктнэсэ лембень пачтямонь систематне ульнесть апак анокста. Истя, ацамковонь 8-це чистэ Зубова-Полянань ёнксонь лембень пачтямонь сеттнесэ лиссь авария, лембевтеме кадовсть ламо квартирань 25 кудот, эйдень кужо, Мордовия Республикава УФСИН-нь 2 учрежденият. «Нама, авариятнень витемс вийтне ды средстватне сатыть. Ансяк неть кевкстематнень эряви витемс, - тешкстызе Артём Здунов. – Ванноматне невтизь, косо-бути арасельть анокчинь паспортт, тень лангс эряви явомс башка мель. Секскак сыця лембетнестэ эряви парсте анокстамс сёксень-телень шкантень».

Ледстясынек, Мордовия Республикань Прявтонь тевтнень топавтыцянть кармавтоманзо коряс регионсонть теезь апак учонь зыянов тевтнень а нолдамонь ды витемань комиссия, конась свалшкань лувсо ванны ЖКХ-нь ды жизнеобеспечениянь систематнень важодемаст мельга.

Игорь Кокунов мерсь, те ёнкссо свалшкань важодемась лезды а нолдамс зыянов тевть. «Важодемась ламо. Сехте прявтось ней – весементь ванномс, косо ды мезе а саты. Истят аварият иляст уле», - тешкстызе Ростехнадзоронь Волжско-Окской управлениянь руководителесь.

Вастовомасонть кортамось истя жо мольсь тундонь чадыведентень анокстамодонть. Региононь руководителенть валонзо коряс, ловдонть пек ламо. Тень кувалма покш мель эряви явомс гидротехнической сооружениятненень.

Мордовия Республикань Прявтонть пресс-службась