Мордовиянь Прявтонь тевтнень топавтыцясь Артём Здунов макссь ушодкс «Монь Мордовиям» проектэнтень

Мордовиянь Прявтонь тевтнень топавтыцясь Артём Здунов макссь ушодкс «Монь Мордовиям» проектэнтень

Проектэнть вельде редявить, кастовить-кепетевить ды кирдевить виев руководительтне. Изницятне совавтовить Мордовия Республикань управленческой кадратнень резервантень ды сыненст мереви примамс участия управленческой ёрокчитнень виевгавтомань коряс тонавтомань программасонть. Проектэнть анокстызе ды ютавты Мордовия Республикань Прявтонть администрациясь «Россия – страна возможностей» АНО-нть лезксэнзэ вельде.

Эйзюрковонь 3-це чистэ Республикань Кудосонть ютавтовсь пресс-брифинг, конась алтазель «Монь Мордовиям» республикань кадрань проектэнть ушодомантень. Тосо ульнесть Мордовия Республикань Прявтонь тевтнень топавтыцясь Артём Здунов, проектэнь оценочной мероприятиятнень блоконь руководителесь Дмитрий Лисицын, Мордовия Республикань Общественной палатань председателень полавтыцясь, проектэнь Наблюдательной советэнь председателесь Наталья Долматова ды Россиянь теннисэнь Федерациянь президентэсь, проектэнь Наблюдательной советэнтнень совицясь Шамиль Тарпищев.

Мордовия Республикань Прявтонь тевтнень топавтыцясь Артём Здунов яволявтсь од проектэнть ушодомадонзо ды ёвтнесь сонзэ прявт смутенть коряс: «Минь ушодтанок Мордовиянь властень органтнэнь туртов руководительтнень вешнемань коряс республикань кадрань проект. Весе масторонь келес регионтнэнь кадрань неть проекттнэ кармасть аволь ансяк профессионалтнэнь, истя жо мелень явиця, ёроков ломантнень пурнамонь куншкакурокс. Управленческой аппаратось тееви кода вейкине команда, конась важоди вейсэнь тевенть коряс – виевгавтомс территориянть, вадрялгавтомс ломантнень эрямост».

Сон тешкстызе республикань властень органтнэсэ кадратнень одкстомтомань эрявиксчинть. «Минек прявт тевенек – теемс вадря условият эрьва ломаненть парсте эрямонзо туртов. Те покш зарплата марто важодемань таркат, социальной инфраструктура. Тень туртов миненек тынк марто эряви теемс порядок управлениясонть, шумбралгавтомс финансонь системанть. Минь кемтянок, тень туртов эряви одкстомтомс управленческой аппаратонть, тердемс тов ломанть, конатненень икеле эзь удала понгомс управлениянь системантень эли сынь тень коряс эзть арсеяк», - мерсь Артём Здунов.

Дмитрий Лисицын ёвтнесь проекттэнь ды сонзэ юрсо аштиця методологиянь пелькстнэде: «Монь Мордовиям» проектэсь ютавтови се лувонть коряс, конась невтизе лезэвчинзэ эрьва кодамо покшолмань кадрань проекттнэсэ. Сонзэ башка ёнксозо сеньсэ: тестированиянь ды питнень максомань технологиятне ливтезь массовой уровнянтень. Проектэсь ашти ниле пельксстэ, конат вейсэндить дистанционной ды очной варчамотнень. Тень вельде седе ламо ломанть варчасызь ёрокчист, кочкавить сехте виев специалисттнэ. Участниктнень профессиональной компетенцияст питневтеме вансызь эксперттнэ, сындест карми содамо региононь руководствась».

Брифингенть ушодомадо икеле ютавтовсь проектэнь Наблюдательной советэнь васенце промксось, сонзэ председателекс кочказь Мордовия Республикань Общественной палатань председателень полавтыцясь Наталья Долматова. Сонзэ валонзо коряс, Наблюдательной советэнть прявт тевезэ – ютавтомс проектэнть неявиксстэ, ломантне кемевельть: «Минь домкасто весементь ваннынек, кода карми ютамо кочкамось, ды тешкстаса: сон карми алкукс видекс, весе участниктнень кармить вейкеть возможностест. Путсынек весе вийтнень, неть вешематне иляст колаво».

Сон башка тешкстызе те проектэнть топавтомань эрявиксчинть: «Весень минек туртов пек эрявикс се ёнксось, конань тешкстызе Артём Алексеевич, - теемс эрьванть туртов эрямонь вадря условият. Монень, кода школань икелень прявтонтень, Общественной палатань представителентень ды ломанентень, социально-экономической ёнкстнэнь виевгавтомась канды покш смусть. Ули мелем, касовольть тонавтыцятнень зарплатаст, эйкакштнень улевельть вейкеть возможностест вадря образованиянь получамонть туртов. Касомань точкатне панжовост кода ошсо, истя жо велетнесэ. Виевгадозо промышленностесь. Сехте прявтось – од ломантне иляст туе республиканть томбалев».

Шамиль Тарпищев макссь покш питне «Монь Мордовиям» проектэнь участниктнень кочкамонь лувонтень: «Лован пек прявтокс сень, участниктнень пельде а вешеви госслужбань опыт, - васенце таркас ливтевить обуцянь ёнкстнэ ды бажамось улемс лезэвекс чачома ёнксонть туртов. Эрьвантень мереви ёвтамс содамочинзэ ды ёрокчинзэ се ёнкссонть, конасонть ней важоди, - бизнессэ, промышленностесэ, образованиясо, медицинасо. Кеман, региононь управлениянтень ёроков прявттнэнь тердемась, полномочиятнень тенст максомась – Мордовиясо полавтоматнес виев ды шкастонзо теевиця эскелькс».

Яволявтоманть мереви максомс моя-мордовия.рф. сайтсэнть чадыковонь 16-це чинть видьс. Тердевить Россиянь Федерациянь 25-55 иесэ эрицят, конатнень ули высшей образованияст (специалитет эли магистратура) ды управлениясо опытэст (кавто иеде седе аволь аламо) эли специльностень коряс важодемань стажост (колмо иеде седе аволь аламо). Прявт вешемакс ашти Мордовия Республиканть лезэс тевтнень витемантень анокчись.

Проектэнь изницятненень мереви примамс участия «Развитие управленческих навыков руководителя» тонавтнемань программасонть, конасонть мастер-класст кармить максомо «Губернатортнэнь школань» тонавтыцятне. Весе изницятне совавтовить Мордовия Республикань управленческой кадратнень резервантень.

Проектэнть коряс домка кулянть мереви ванномс  моя-мордовия.рф сайтсэнть.